“Heydər babaya Qarabağdan məktub” adlı esse müsabiqəsinin qalibləri mükafatlandırılıb-Foto

Ümummilli Lider Heydər Əliyevin 100 illik yubileyinə həsr olunmuş “Heydər babaya Qarabağdan məktub” adlı esse müsabiqəsi başa çatıb. 
Müsabiqə Qarabağ İqtisadi Rayonunda Azərbaycan Respublikası Prezidentinin Xüsusi Nümayəndəliyi, Qarabağ İqtisadi Rayonunda Bərpa, Tikinti və İdarəetmə Xidməti və Qarabağ Regional Təhsil İdarəsinin təşkilatçılığı ilə keçrilib.

Müsabiqənin yekun tədbiri Tərtər rayonunun işğaldan azad edilmiş Talış kəndində təşkil olunub. Tədbirdə Qarabağ Regional Təhsil İdarəsini əhatə edən rayonların ümumtəhsil məktəblərinin ən yaxşı yazıların müəllifi olan 30-a yaxın şagirdi və təhsil işçisi iştirak edib. Tədbirdə əvvəlcə Ümummilli Lider Heydər Əliyevin və ölkəmizin ərazi bütövlüyü uğrunda şəhid olanların xatirəsi bir dəqiqəlik sükutla yad edilib.

Tədbirdə çıxış edən Qarabağ İqtisadi Rayonunda Azərbaycan Respublikası Prezidentinin Xüsusi Nümayəndəsinin müavini Bəşir Hacıyev,  Qarabağ Regional Təhsil İdarəsinin müdir müavini Anar Məcidov və Qarabağ İqtisadi Rayonunda Bərpa, Tikinti və İdarəetmə Xidmətinin mətbuat katibi Leyla Sarabi Ulu Öndər Heydər Əliyevin uşaqlara, böyüməkdə olan gənc nəslə və təhsilin inkişafına göstərdiyi diqqət və qayğıdan danışıblar.    

Tədbirin sonunda esse müsabiqəsinin qaliblərinə fəxri fərman və hədiyyələr təqdim edilib.