Kraliça II Elizabet 70 illik hakimiyyəti dövründə, xüsusən də gündəlik işləri ilə bağlı bir çox vərdişlərə sahib olmuş bir insandır.
Ülyahəzrət hər səhər eyni vaxtda oyanır və eyni qrafikə uyğun hərəkət edir. Yuxudan oyandığı zaman ilk gördüyü işlərdən biri şəkərsiz və südsüz, berqamot ətirli bir fincan “Earl Grey” çayı içməkdir. Desert üçün isə kral ailəsinin keçmiş aşpazı Darren Makqredinin dediyinə görə, kraliça “British Chocolate Bath Olivers” və “Pink Champagne Truffles”a üstünlük verir.
“Bu, xırtıldayan, vam odda bişmiş peçenyelərin üzərinə gəzdirilmiş bol tünd şokolad – tərkibi mayaotu, səməni və əlbəttə ki, tünd şokoladdan ibarət olan, 1930-cu illərin patentləşdirilmiş reseptindən istifadə etməklə hazırlanmış dadlı biskvit delikatesidir”, – deyə aşpaz bu məhsulu təsvir edib.
Yeri gəlmişkən, “kral” peçenyeləri elə də ucuz deyil, 200 qramlıq qablaşdırma Böyük Britaniyada sizə təxminən 14 dollara başa gələcək. Məlumdur ki, kraliça şirniyyatı çox sevir və yaxınları onu hətta “şokoqolik” kimi də qələmə verirlər.
“Ülyahəzrət tam bir şokolad həvəskarıdır. Tərkibində şokolad varsa, menyuya daxil etdiyimiz hər şeyə, xüsusilə də şokoladlı piroqa razılığını verirdi”, – deyə Bukingem sarayının keçmiş əməkdaşları qeyd ediblər.
