Pentaqon yaxın vaxtlarda Ukraynaya hərbi yardım aparan yeddi təyyarənin ABŞ-ı tərk edəcəyini bildirib.
“Növbəti 24 saat ərzində ABŞ-dan bölgəyə yeddiyə yaxın uçuş gözləyirik”, -deyə yüksək səviyyəli Pentaqon rəsmisi brifinqdə məlumat verib.
Qeyd edək ki, bir müddət əvvəl ABŞ prezidenti Co Bayden bəyan etmişdi ki, Vaşinqton Ukraynaya artilleriya, zirehli personal daşıyıcıları və helikopterlərdən ibarət yeni 800 milyon dollarlıq hərbi yardım paketi təqdim edir.
Pentaqondan verilən şərhə görə, Ukrayna qüvvələrinə 200 ədəd M113 zirehli transportyoru, 18 155 mm-lik haubitsa və onlar üçün 40 min mərmi veriləcək. Bundan əlavə, 800 milyon dollarlıq yardım paketinə 11 Rusiya və ya Sovet istehsalı olan Mi-17 helikopteri, 300 “Switchblade” sursatı, 100 zirehli cip, 500 “Javelin” raketi və “minlərlə” digər tank əleyhinə sistemlər daxildir.
