Manşet
XII Qlobal Bakı Forumu təxminən bundan iki həftə əvbəvəl başa çatsa da, Forumun gedişatı, müzakirə edilən məsələlər hazırda dünyanın gündəmindədir. Bu fakt, Forumun əhəmiyyətini bir daha isbat edir.
Forum əsnasında Azərbaycan Respublikasının Prezidenti cənab İlham Əliyevin “Euronews” televiziyasına verdiyi müsahibədə toxunduğu məsələlər və verdiyi açıqlamalar isə Forumun gündəliyinə çıxarılan mövzular və qlobal əhəmiyyətli bir çox prinsipial yanaşmalar baxımından Azərbaycanın dəyişməz mövqeyini bir daha ortaya qoyur.
Prezident İlham Əliyevin müsahibəsində qeyd etdiyi kimi, bu gün bütün dünya ictimaiyyətinə məlumdur ki, bildiyimiz dünya nizamı artıq mövcud deyil və istifadə olunacaq yeni beynəlxalq əlaqə konfiqurasiyasına dair fərqli fikirlər var. Hazırki reallıqlarda hər bir ölkə özünün daxili imkanlarına daha çox diqqət ayırmalı, hətta beynəlxalq hüquqa belə arxalanmamalıdır. Azərbaycan illərdən bəri beynəlxalq hüququn fətqli mövqeyinin qurbanı olub. Bu artıq bir faktdır ki, bəzi beynəlxalq təşkilatlar çalışmaz durumdadırlar.
Cənubi Qafqazfa mövcud olan siyasi-iqtisadi vəziyyət haqqında danışan Prezident İlham Əliyev, ətrafımızda baş verən böhranlardan regionumuzun qorunmasının vacib bir məsələ olduğunu vurğuladı. Onilliklər ərzində Cənubi Qafqazın qarşıdurma və düşmənçilik bölgəsinə çevrildiyini təəssüfllə qeyd edən Prezident, hazırda bölgədə nisbətən sakitliyin hökm sürdüyünü və münbit şərait dövründə növbəti hərbi qarşıdurmanı istisna edəcək geniş təhlükəsizlik mexanizmlərinin yaradılmasına ehtiyac olduğunu bildirdi.
Cənubi Qafqaz respublikaları arasında yaxın tarixdə fəal təmasların mövcud olduğunu açıqlayan cənab Prezident, qonşuluq münasibətlərini davam etdirməyin vacibliyini vurğuladı, hazırda yaranan regional fürsətlərə fokslanmağın əhəmiyyətli olduğunu bildirdi. O, bölgədə mövcud olan problemlərin həlli naminə, bu sahədə hələ sovetlər dönəmində malik olduğumuz müsbət təcrübəyə istinad edə biləcəyimizi də ifadə etdi.
Müsahibəsində milli maraqlarımızla bağlı fikirlərini açıqlayan Prezident İlham Əliyev, dedi ki, milli maraqlarımız məsələsində heç kəsə və heç nəyə arxalanmamışıq. Hər bir ölkə anlamalıdır ki, o, öz taleyinin sahibidir.
Davamlı olaraq kiminsə yardımına bel bağlamaq olmaz. Əvvəla bu yardımlar həmin ölkəni zəiflədir, ikincisi, bu yardımın daimi olacağına dair heç bir zəmanət yoxdur, üçüncüsü isə bu yardımlar suverenliyin bir hissəsinin itirilməsinə səbəb ola bilər. Biz suverenliyimizi və ərazi bütövlüyümüzü özümüz bərpa etdik və indi də gələcəyimizi özümüz qururuq.
Yaxın gələcəkdə bölgədə qalıcı sülhə nail olmağın yolları haqqında danışan Prezident İlham Əliyev, bu məsələdə o qədər də nikbin olmadığını ifadə etdi. Prezident, Ermənistanla Azərbaycan arasında sülh sazişi imzalanana qədər sabitlik olmayacağını da bildirdi.
İkinci Qarabağ müharibəsinin bitməsindən beş il keçməsinə baxmayaraq, Ermənistanla sülh müqaviləmiz yoxdur.
Yaxın Şərqə və Afrikaya yanaşmada da vəziyyətin eyni olduğunu və münaqişələrin sayının getdikcı artdığını bildirən cənab Prezident, son dövrlərdə sadəcə Qarabağ münaqişəsinin öz həllini tapdığını, həm də bu münaqişənin beynəlxalq hüquq, tarixi ədalət əsasında həllini tapmış yeganə münaqişə olduğunu və bu həll mexanizmini bütün dünyanın qəbul etdiyini önə sürdü.
Müsahibəsində qlobal dəyişikliklər haqqında da bəhs edən Prezident, Vaşinqtonun, konkret olaraq Amerikanın yeni administrasiyasının yürütdüyü siyasət haqqında danışaraq, Ağ Evdə qəbul olunmuş qərarlardan bu günkü dünyanın nə qədər asılı olduğunu açıq şəkildə gördüyümüzü ifadə etdi.
Keçmiş ABŞ administrasiyasının Azərbaycanla bağlı addımlarına toxunan Azərbaycan Prezidenti, hazırda baş verənlərlə bağlı çox nikbin əhvali-ruhiyyədə olduğunu, ABŞ-ın əvvəlki administrasiyası ilə Azərbaycan arasında münasibətlərin pisləşməsindən məyusluq hissi keçirdiyimizi, onların mövqeyinin milli maraqlarımıza ədalətsiz yanaşmadan ibarət olduğunu, bu səbəblə Tramp administrasiyası dövründə ABŞ ilə münasibətlərimizin və güclü tərəfdaşlığımızın yenidən qurulmasına çox nikbin baxdığımızı bildirdi.
Müsahibəsinin sonunda bir daha XII Qlobal Forumun əhəmiyyətinə toxunan Prezident İlham Əliyev, çoxsaylı qonaqların iştirak etdiyi toplantıların hadisələri müvafiq şəkildə qiymətləndirmək, fikirləri, narahatlıqları və ya gözləntiləri bölüşmək baxımından vacib olduğunu vurğuladı.
Prezident eyni zamanda ümid etdiyini bildirdi ki, Forumda ideyaların toqquşması baş verəcək və bu da forumu uğurlu edəcək.
Jalə Əliyeva
Millət vəkili,
Milli Məclisin Ailə,qadın,uşaq
məsələləri komitəsinin sədr müavini
